書法老師用台語紹介春聯 𤆬囡仔認捌年節風俗

書法老師謝侑家講，「有兩个人足𠢕的，in攏佇咧桃仔樹跤，去共妖魔鬼怪刣死。」

老師解說貼春聯的由來；相傳千外年前，有兩位仙人，也就是咱咧講的門神，佇桃仔樹跤斬妖除魔，所致出現桃仔符用來避邪，後來演變成做這陣的春聯，也發展出濟濟吉祥話

書法老師謝侑家強調，「演變一寡仔招財進寶、日進斗金，各種各種的寫法，來咱過年過節有一个創新的做法，所以過年過節有各種變化，但是宗旨是逐家快樂，逐家趁錢、逐家平安就好。」
彰化有幼兒園為著予小朋友認捌過年的傳統風俗，特別邀請書法老師教囡仔寫春聯，閣用台語解說相關的吉祥話，囡仔攏感覺真趣味

囡仔姊講，「老師有寫招財進寶、大吉大利」「老師寫春聯足媠的、有趣味」

平和非營利幼兒園理事長 陳麗秋說明，「因為過年欲到矣，想講予小朋友感受過年的氣氛，予小朋友佇逐年這个時陣，予ﰀ練習寫毛筆按呢。」

幼兒園表示，過年家家戶戶攏會貼春聯，尤其春聯的由來參吉祥話攏足有意思的，透過活動，毋但會當予囡仔人認捌過年的傳統文化，閣會當寫春聯、提轉厝貼，加添過年的氣氛。