臺北市文化局昨昏依照無形文化資產審議結果，共歌仔戲演員-楊麗花登錄做傳統表演藝術-「歌仔戲」的保存者。文化局表示，楊麗花是歌仔戲的代表性人物，對歌仔戲貢獻真大。（此則新聞標題、導言、內文皆為臺語文。）
聽著這段逐个人攏熟似的聲音，就知影歌仔戲國寶楊麗花來矣。楊麗花的爸母攏是歌仔戲演員，所以伊的搬戲人生自細漢就開始，對野台戲開始、到內台戲、落尾進入通人知的電視台，楊麗花成做出名人物。楊麗花注心歌仔戲70幾年，除了演出、也牽教後輩，甚至共歌仔戲推廣到海外，對歌仔戲貢獻真大，台北市文化局也共楊麗花登錄做傳統表演藝術歌仔戲保存者。
台北市文化局副局長陳譽馨講，「楊麗花經歷過內外台，閣有電台、電視、閣有電影的磨練，會使講是臺灣非常出名，的歌仔戲代表性人物，也培養非常濟後輩。」
佇舊年5月底，公視、台視、國家影視聽中心共同製作的楊麗花紀錄片開鏡，踮咧伊身軀邊的，是伊的徒弟，也是台灣出名歌仔戲演員陳亞蘭。陳亞蘭捌講，楊麗花是伊的恩師，伊真佩服楊麗花、用青春歲月傳承歌仔戲的精神。
陳亞蘭歌仔戲團長陳亞蘭強調，「伊真希望共咱台灣唯一的戲曲文化，佇台灣土生土長的文化，會當閣較發揚佇咧，除了咱本土、咱台灣以外，國際上伊嘛希望會當看著遮爾媠的戲曲文化，伊定定攏講一句話，伊毋認老、食到老、學到老，無牙嘛欲哺土豆，嘛是欲共歌仔戲傳承落去。」
陳亞蘭講，楊麗花也直透綴時代咧行，用電腦科技結合歌仔戲，佇劇場演出，予歌仔戲通一直創新、唌少年人來看。牽教徒弟的熱情也一直攏佇咧，陳亞蘭講，只要伊有推出作品，楊麗花猶是會針對劇本、音樂、搬戲調度等方面，共伊指導，對真濟方面攏會當看出楊麗花對歌仔戲的堅持佮熱情。