「阿里山畫家」林國治美術館開幕傳承創作精神
發布時間：
更新時間：
2015年過身的藝術家林國治畫阿里山，是自少年畫到老，予人號做「阿里山畫家」。伊在生的時佇嘉義新港教出濟濟畫家。今仔日林國治美術館佇新港正式開幕。
12/30，林國治美術館正式佇嘉義縣新港來開幕，美術館除了展出藝術家林國治無仝時期的作品，閣重現伊早期藝術創作的情況，予新港鄉閣加一個推廣藝術的空間。林國治美術館開幕的第一場展覽，就是用林國治的人生來做主題，紹介伊佮新港的關係，林國治的查某囝講，新港是爸爸藝術的起點，嘛是伊上快樂的記持。林國治藝術教育基金會表示，這場展覽會展到明年4月28，這當中閣會邀請藝術家來舉辦講座，未來嘛會配合其他的主題，舉辦無仝的展覽，予在地的藝術推廣，愈來愈豐富。
張曼亭/編輯
