彰化美術館宮廟藝術展 AI互動體驗臺灣文化

誠心用雙手拜拜，祈求好運的天燈就出現囉，彰化縣美術館當咧舉辦宮廟藝術展覽，其中一區就是互動式體驗，結合AI的互動遊戲，大人囡仔都感覺真趣味

民眾表示：「頭一擺看著這科技的物件，感覺誠好，這馬欲祈願毋免閣去廟寺，踮遮就會使矣。」

學生表示：「真好，毋但學著廟的神明有啥人，嘛看著真濟畫。」

這改的宮廟藝術展覽，規劃三大展區，除了互動式的體驗，也有展出濟濟藝術家的作品，有雕刻大師朱銘、人間國寶施鎮洋的立體作品，閣有臺灣現代版畫之父廖修平參知名畫家周天龍的創作

藝術家廖修平表示：「廟寺的題材，是咱臺灣真重要的東方美學。」

藝術家周天龍表示：「因為鹿港是我上愛的所在，我愛畫古蹟，古蹟我第一个想著的，就是想著鹿港。」

策展人陳筱君表示：「阮希望借著傳統佮現代的對話，會當予逐家知影，對過去現在未來，是按怎的發展。」

彰化縣立美術館表示，這擺的展覽，有傳統也有創新，嘛向八个公立美術館博館借典藏品，希望透過多元的展覽作品，予民眾看著臺灣宮廟美學。