真理大學台文系風聲欲停招 師生發起連署反對

最近傳出真理大學臺文系欲停招的消息，嘛有學生發起連署，連署書內底寫著臺文系拍算佇114學年停止招生。身為臺灣第一个臺灣文學系欲停招，對濟濟臺文界的老師和學生來講攏是誠大的衝擊，創系的前系主任張良澤，和在學的學生攏表示反對。

真理大學臺文系創系系主任張良澤強調，「臺文系是一種象徵性的物件，你對臺灣人的臺灣魂的打擊會真大，招生有問題、少子化當然這是一个問題，但是你若內容真充足，教師的內容真堅強，臺灣人應該會真重視這个系的存在。」

張良澤呼籲現任系主任，應該愛向校方堅持反對停招的立場。其實2011年就有中山醫學大學臺文系停招、收掉的例，往過捌做過系主任的何信翰教授表示，事實上私立大學決定敢欲停招的權責單位是學校的董事會咧搦權，伊認為目前臺文系所拄著的上大問題就是學生的出路，會直接影響著招生。

臺中教育大學臺語系副教授何信翰說明，「社會上臺灣語文相關工課愈來愈濟，但是你這个系所咧教的內容，抑是講這个系所的方向走向，是毋是會當符合社會的需求，你這馬大學嘛愛思考講，我有啥物特色，我佮類似的對手比起來，我佮仝性質的系所比起來，我有啥物特色。」

何信翰指出目前和臺文相關的工課，除了做老師以外，閣有影視產業、出版、廣告，遮的缺攏有咧增加，毋過攏較注重臺語的語言應用，但是毋是所有臺文系所攏偏向語言的訓練，伊認為真理臺文會拄著停招的問題，除了囝生少，嘛和系裡經營的面向有關係。