日本企業進駐高雄唌人陣 新堀江望轉型拚復興

來到高雄的這間百貨，今仔日是平常時仔，外口仝款有人排隊，人陣是插插插，鏡頭徙到隔壁的新堀江，商圈店面貼欲出租的廣告，人陣是減真濟。

販仔表示：「大概差十幾倍，較早人客真濟。」

民眾表示：「較早是感覺人足濟，這馬較少矣。」

這个月，有兩間日本企業進駐佇百貨公司，百貨公關表示，來踅百貨公司的人陣有加三成。加減有帶動邊仔新堀江的商機，加上市府為著欲活化商圈，有規劃活動，攤商表示，愈接近年底，活動變濟，人陣確實有沓沓仔轉來。

販仔表示：「欲到聖誕節有活動，我感覺人陣袂bai2，無親像較早遐爾稀微。」

過去人講北部有西門町，南部有新堀江，商圈理事長表示，往過攤商上濟有到260攤，這馬賰150間爾爾，佇新堀江經營三十幾年的攤商表示，這馬佮過去繁榮時期，已經無法度比。

新堀江商圈理事長楊翔茗表示：「目前業績，無像較早 差不多五分之一爾爾。」

除了商圈徙到北高雄，閣有受疫情影響，袂少業者做袂落去收擔，而且辦活動、人陣只是一時的，地方猶是向望政府會當重視。

高雄市政府經濟發展局主任秘書陳怡良表示：「阮逐年攏有針對商圈，提供行銷抑是硬體編列補助費用。」

面對新堀江這馬的狀況，經發局回應講，市府每冬攏有經費，商圈業者攏會當申請，來針對硬體、軟體的設施做改善，經發局嘛講會繼續佇中央公園舉辦市集活動，向望新堀江會當恢復過去的光景。