自由之家：中國等26國 有佇海外鎮壓、恐喝記者

無國界記者組織捌發佈2023年新聞自由度指數，指出中國是「全球上大的記者監獄」。像講2020年中國新冠疫情嚴重，中國公民記者張展，透過社群媒體刊出武漢疫情的資訊，就予中國判關4年。

中國公民記者張展表示，「這改的疫情對人權是真大的破壞，致使講真濟人，喙齒根咬咧嘛欲做一个檢測，
來證明家己是健康的。」

另外，捌做過中國官方媒體「中國環球電視網」澳洲的華裔主播成蕾，予中國以違反國安法共關3年，佇今年10月中出獄，這件代誌嘛予外界質疑中國是咧用人質進行外交協商。 拜四，國際人權組織「自由之家」發佈報告指出，包括中國、露西亞等等上無26个國家透過綁票、抹烏、恐喝親友等等手段，迒國鎮壓新聞工作者。台灣人權促進會表示，這款對新聞自由抑是人權的迫害，事實上嘛形成專制國家和民主國家互相對抗的趨勢。

台灣人權促進會秘書長施逸翔強調，「保護衛士，伊有另外一份報告講，某一寡國家允准中國共產黨，中國政府彼寡執法人員，會使佇海外執法，遮的其實攏會增加毋但是記者，人權捍衛者閣較濟的風險，徛佇自由人權陣營的這寡國家，政府你無論如何，就是愛去保護這寡受著威脅的新聞記者，然後提供各種支持。」

台權會指出，自由之家的報告，針對全球人權侵害提出警告，怹也呼籲臺灣政府應該趕緊制定難民法，佇咧民主的陣營，愛用積極的行動來維護人權。