臺南大學的教授參業者合作研發一台結合AI的機器人，這馬佇國小開始使用，這台機器人會參你開講，會曉講台語，甚至英語華語也會曉。教授講未來臺語課加一種教學方式，提升囡仔學母語的意願。（此則新聞標題、導言、內文皆為臺語文。）
「我下暗欲請你食暗頓，當然啊、毋過毋是佇厝裡。」
逐家無看毋著機器人竟然嘛會曉講台語，實在真鑠奅。無論是用台語參機器人開講，抑是參伊講英文佮中文，只要摸機器人的頭，伊就會詳細聽你講，並且連鞭回答你。這隻不止仔厲害的機器人初六正式參逐家見面，目前干焦佇臺南仁德國小才看會著。學校共台語課結合科技，毋但趣味心適，囡仔嘛閣較願意開喙講母語。
臺南市仁德國小學生，「會當予我學英語佮臺語，我感覺袂䆀」
臺南市仁德國小學生，「這馬上課攏會使用機器人來上啊，感覺足讚的。」
臺南市仁德國小老師吳耿良，「叫囡仔徛咧講，逐家會歹勢啦，這馬對機器人講話，逐家就會更加有興趣。」
機器人內底囥入AI的元素，伊就會使參人對話做互動，甚至嘛會曉比動作。毋過，若講較深的詞，機器人伊回答就會小可仔各樣。臺南大學的教授講，主要因為這台機器的智能目前干焦國校仔一年仔爾，伊參人仝款攏愛透過練習就會愈來愈輾轉。經過實際的測試，有7成的正確率。
女媧創造股份公司營運長張智傑講，「技術就是ASR會使收音，才閣用NLP抑是大語言模型，予伊會當像大腦按呢思考，落尾有TDS予伊會使講出聲音，這就是阮上基本的架構。」
國立臺南大學資訊工程系教授李健興說明，「臺南遐有一台機器處理了，才閣共聲 送轉來到咱仁德國小遮的機器人，透過濟改的練習，咱的機器人會愈來愈厲害。」
台南大學的教授參科技公司.出版社拚勢用科技推捒母語，到今總算有成果矣，這種全新的教學方法，予囡仔有無仝的體驗，未來IN嘛暗算會推廣去各學校，欲予逐家有機會認捌台語的媠。