七股龍山宮隔47年閣做醮 煞拄搪風颱來擾亂

原本建醮壇搭甲真氣派，毋過頂懸的大仙尪仔竟然予風搧倒去，甚至主會首的壇嘛予風吹甲東倒西歪，規个害了了。七股龍山宮閬47冬總算欲閣做醮，估計開上千萬，煞拄著風颱來擾亂。建醮主委指出，前幾工已經有請工人先來拆三分之一，袂赴規的拆落來就攏倒去矣。廟方講，in會趕緊修繕恢復，欲共建醮圓滿完成。

臺南七股龍山宮建醮主委王崑隆表示，「我知影風險度足懸，所以兩三工前就一直催工人，伊共我講伊加強矣無問題，透早起來七點我隨閣敲電話，我講風颱猶未來風真透石頭有徙位矣，我就知影大事不妙。」

在地居民黃小姐講，「風颱傷透無拆起來足危險啦。」

仝款會受風颱影響的猶閣有農產品，大大粒青青錦錦的青皮椪柑佇咧樹仔頂等欲採收，台南東山區的椪柑當進入產季，果農in攏心驚驚，透早趕緊去園用竹架固定果樹，就驚風傷透水果攏落落來。

果農吳振廷講，「欲採收期啊小可搖就落甲規塗跤，這山埔地無法度用防風網，參平地咧種一寡瓜類的菜類的無仝。」

果農陳豐文補充，「風颱欲來嘛無法度啊，咱這看天食穿的。」

青皮椪柑年初因為洘旱，就有落果矣。這馬風颱閣欲入來，農民估計今年產量會減1.2成。台南市嘛預測暗時會有一寡雨水，上大陣風嘛有可能會達到8.9級，所以嘛已經宣布4號暗時六點開始停班停課。