鄭南榕基金會舉辦，自由紋理巡迴展覽，今年最後一站來到高雄三餘書店展出，透過鄭南榕珍貴的手稿佮性命的故事，向望少年人會當了解歷史，佮臺灣民主自由的珍貴。（此則新聞標題、導言、內文皆為臺語文。）
由歌手彈吉他唱這首迷人的客語歌曲，活動正式開幕，現場嘛有真濟關心鄭南榕展覽的人，佇1989年鄭南榕過身了後，伊的查某囝鄭竹梅整理真濟珍貴資料，保存了30冬的時間，今年巡迴展出，來高雄站看展覽的民眾，才感受著原來過去臺灣社會是遮爾威嚴艱苦。
民眾表示，「一个有想法的人，當然毋但干焦鄭南榕先生，其實有真濟人，包括湯德章律師，抑是其他人，in攏是有理想的人，毋過煞佇彼个時代，被迫結束in的性命。」
現場是展示鄭南榕創辦的自由時代週刊各期刊物，包括軍總的傳票、手稿佮批等等，向望用藝術的角度，予這馬少年人會當熟似鄭南榕，伊是按怎實現言論自由的理想。
鄭南榕遺孀 葉菊蘭：「今年是少年人in用按呢的方式，來表示對所謂臺灣的英雄，背後到底有佗一寡代誌，按呢的一个展出。」
鄭南榕查某囝鄭竹梅：「佮少年人溝通為主，主要是因為佇阮過去兩三冬，參與整理資料過程中，阮猶是希望逐家會當，共鄭南榕回歸做一个人 來熟似。」
為著紀念鄭南榕宣揚言論自由理念，鄭南榕基金會到臺灣各地巡迴展覽，今年最後一站來到高雄，透過歷史資料呈現伊的一生，向望逐家會當更加了解言論自由的珍貴。