新竹城隍廟逐年佇中元節前兩工，就是舊曆七月十三暗時，照例會派出城隍爺的大公子去出巡，予沿路的孤魂野鬼有機會申冤，上百位民眾攑火把走佇市區，也有人夯枷綴咧後壁欲消災解厄。（此則新聞標題、導言、內文皆為臺語文。）
向城隍爺報告煞，除了范謝兩位將軍以及城隍爺大公子，沿路民眾逐家手攑火把，出發予孤魂野鬼申冤，因為七月半城隍爺會出巡，in是提早出來替城隍爺清查路線。
新竹都城隍廟管理人鄭來聖講，「(城隍爺)大公子出來，替城隍爺佇七月十五進前，行七月十五奉旨賑孤繞境，仝款的路線、先出來巡一下，來看放假的好兄弟，逐家敢有食好以及過了敢好。」
新竹城隍廟逐年除了舊曆七月十三夜巡以外，另外閣有一項傳統文化-夯枷活動，民眾身軀頂掛的是代表罪過的紙鎖，誠心祈求城隍爺的赦免。學者指出，民眾用夯枷的方式，除了有替懺悔的意思，嘛有提醒家己毋通閣再犯的意思。
清大人類學研究所副教授 呂玫鍰說明，「夯枷解厄的這款習俗，其實就是借著一種苦行，抑是一種虔誠、承認懺悔的一種方式，來洗清家己的罪惡。當然這只是心理上，抑是講會當提醒家己，應該按怎改正，予家己的身心靈，會當更加純化，至少佇祈求身體健康，抑著是求解厄方面，透過神明的力量，來幫助家己來解除一切災厄。」
舊曆七月中元普渡，除了拜好兄弟，佇民間信仰內底，嘛有袂少的風俗佮禁忌，學者表示，毋管啥物形式，攏是愛逐家感恩、懺悔、講好話、做好代。因為有好心、好運就會家己來。