頭一屆本土教育推展貢獻獎 3个個人、2組團體

發布時間:
更新時間:
教育部舉辦頭一屆本土教育推展貢獻獎,今仔日舉行頒獎典禮,計共表揚3个個人、2組團體,嘛希望鼓勵閣較濟人來投入本土語言教育推廣的工課。(此則新聞標題、導言、內文皆為臺語文。)
為著表揚對本土教育推展有貢獻的個人佮團體,教育部頭擺舉辦本土教育推展貢獻獎頒獎,計共選出3个個人獎佮2組團體獎。
20外年來,一直攏咧推廣歌仔戲文化的黃美靜老師表示,臺語、臺語文佮歌仔戲、關係密切,傳承歌仔戲嘛是咧傳承臺語。
個人獎得獎人 黃美靜
我感覺講 這馬的囡仔
就是講 in可能較多元
臺語攏講袂輾轉
會使藉著咱學歌仔戲
毋管是詩詞 抑是一般的對話
攏會使有幫助
另外,嘛是提著個人獎的文史工作者--何文賢、伊長期佇臺北市文山地區、做文史保存的工課,伊認為民間的力量真大,文史保存需要靠眾人的力量。
個人獎得獎人 何文賢
對文化保存的物件
民間的力量真大
真濟攏是自本欲拆掉
但是透過民間的力量
共伊保留落來
大概你這馬有價值的物件
想欲拆 攏無才調拆
真濟攏是因為民間有倡議
國家語言發展法通過實施了後,政府有投入資源,本土語言、本土教育嘛漸漸仔受著重視。教育部長希望國人除了重視本土語言發展之外,嘛愛落實本土教育。
教育部長 潘文忠
毋但佇語言的這方面
是一个誠重要的基礎
曷若本土教育
包涵的面向閣較闊
番薯落土 才會爛 才會湠
除了個人獎之外,屏東縣青山國小,佮嘉義市宣信國小兩間學校攏是共本土環境教育融入去課程當中,予學生會當佇課程當中、認捌鄉土佮族群,予文化釘根,兩間學校攏提著本土教育推展貢獻獎的團體獎。
熊楚瑜/編輯