通膨害成本大起 匈牙利30年臺灣菜餐廳僫經營

師傅研包仔皮，紲落來共菜餡包入去，一个一个白phau-phau的菜包就捏好矣。這間台灣人唐江寧、開佇匈牙利布達佩斯的台灣菜餐廳，真濟匈牙利人攏真佮意。這間餐廳，是已經開了30年。

匈牙利台菜餐廳頭家，唐江寧表示：「臺灣人當然做臺灣菜，著無？阮就是特別做一寡割包、滷肉飯這寡料理，像前幾工阮配合大使館，支援in做活動，阮也做一寡潤餅，閣有阮也做王梨酥。」

唐江寧講，伊原底是佇這間厝的二樓開旅行社，為著房地產投資，也佇一樓開台灣菜餐廳。唐江寧講，這間餐廳的濟濟台灣菜，是誠合在地人的口味。

匈牙利民眾表示：「我佮意牛肉類的料理佮魚，真濟種啦！我查某囝真佮意點心，這就是為啥物阮來遮。」

匈牙利台菜餐廳頭家，唐江寧表示：「in真佮意，阮這間餐廳是真袂bai2，佇阮遮做散工的人攏會參朋友講。」

但是匈牙利的餐飲業當拄著欠工，加上因為戰爭等等因素，成本是大起，這間餐廳也強欲無法度經營。

匈牙利台菜餐廳頭家，唐江寧表示：「今年正月初一進前，電費起400%、瓦斯起700%，真歹經營。」

唐江寧毋知這間餐廳，閣有法度擋偌久的時間，上歹的拍算、是轉型做飲料店。毋過伊也希望，會當有興趣的台灣人來接手，繼續佇匈牙利煮出台灣味。