公視臺語台南部中心啟用 望平衡南北媒體資源

公視臺語台對108年7月播送到今，欲滿四冬。為著欲佇南部釘根，佇高雄設立南部製作中心，主要的目的就是欲平衡南北資源，在地學者佮大學生嘛充滿期待。

南臺科大資訊傳播系助理教授，黃瓊儀表示：「文化嘛是誠媠，誠美麗。所以這改咱的節目，嘛會使來到咱高雄，猶閣結合咱高雄這馬的科技，猶閣這馬學生的自媒體，會使予咱規个產業規个攏活起來。」

學生表示：「設佇高雄對我來講就會較近，會較方便淡薄仔。」

學生表示：「(對)學生來講未來出路足好的按呢。足有幫助的。」

長期以來媒體攏設佇北部，以北部為主。這馬，公廣集團的南部中心有設專業的電視攝影棚，嘛會佇南部製作各種類型的節目。地方的文史工作者嘛期待南部中心會當予南部人的心聲予人聽著；南部的人文歷史，受著重視。

文史工作者，謝奇峰表示：「咱臺語台會使對地方閣較深入，因為你有閣較深入的部份，會當佇民俗內底，因為有當時仔咱電視的報導攏較淺層。」

中正大學傳播學系暨電訊傳播研究所教授，管中祥表示：「我想臺語台南部中心成立，一定會為(南北平衡)這件代誌，有一寡改變的可能。毋是干焦節目中心就會當改變所有，伊是一个開始，毋過閣較重要的是講，相關的資源敢是有夠平衡分配去每一个所在。」

傳播學者認為，南部製作中心成做一个重要的角色，會當是改變媒體資源、長期無平均的一个開始。除了有產學合作，嘛會結合在地文化產業，形成影視聚落，予臺灣的影視界會當得著眾人的呵咾。