新竹北埔有猴山仔偷食菜蔬 當地民眾誠困擾

猴山仔佇樹林內底跳來跳去，跤手實在真扭掠，新竹縣北埔鄉最近有真濟猴山仔，破壞農作物，毋但偷食菜蔬，而且猴山仔數量愈來愈濟。

民眾：「上大隻的有20斤左右，農作物柑仔攏予食去。」

新竹縣北埔鄉南坑村長 葉貴霖：「食農園的青菜水果，閣會去附近揣物件食，民眾是感覺真困擾。」

猴山仔出現的地點，離上近的社區只有500公尺，村長提醒民眾若是搪著的時陣，千萬毋通提物件共飼。

新竹縣北埔鄉南坑村長 葉貴霖：「應該是來揣物件食，有當時會刁工覕人，毋過若是一大陣的時陣，就根本袂驚人。」

新竹縣農業處森保科長 梁明任：「目前林務局有獼猴電網的補助，針對農民的果樹青菜佮花卉，若是有受著臺灣獼猴的破壞，會當申請補助。佇袂去傷害獼猴的範圍內，用電網圍起來。」

村長講，過去攏是倚山區才看會著猴山仔，這擺規陣出現佇山跤，無排除是因為來揣食的物件，雖然目前並無攻擊人的行為，毋過嘛提醒民眾愛特別細膩。