新竹世博館轉型停工半年 議員:愛共廠商討賠

世博台灣館原本的天燈造形已經改變，毋過內底的空間有的是已經完成，有的只賰工地。

規棟5層樓的工程，經過2擺契約變更，原本2021年12月著愛完工，這馬煞因為包商財務出問題，進度停佇79%，而且已經歇工欲半冬矣。

新竹市議員陳慶齡表示：「現場除了一樓二樓較好以外，本身天燈館的主結構現場是真亂，而且阮感覺設計有需要改善，當然這馬做到一半，未來會要求市府，針對功能性來設計改善。」

市府講目前除了共廠商九百外萬保證金充公以外，紲落來嘛會檢討合約，算出違約金額，要求廠商賠償。

新竹市工務處長曾嘉文表示：「針對完成度較懸的所在，可能先對一樓二樓佇後半年來完工使用，另外三樓到五樓的部份，因為完成度較低，紲落來欲閣檢討規畫方式。」

負責世博台灣館專案管理的廠商，參新竹棒球場工程是仝一間，監督小組質疑是毋是有相關責任，也要求市政府愛去檢討了解。