民雄鬼仔厝掛土地千外坪 劉家後代決定總賣
林緯廷／嘉義報導
發布時間：
更新時間：
目次
1929年起的嘉義民雄劉氏古厝，到今已經有欲百年的歷史，過去捌因為一寡仔傳說故事，較無人敢倚近。一直到劉家後代佇遮經營咖啡店，才沓沓仔轉做一个觀光景點。毋過這馬傳出，古厝所有的地主攏有共識，想欲來共這片千外坪的土地佮古厝攏賣掉。
遊客佇古厝外口翕相，嘉義民雄的劉氏古厝，因為流傳鬼仔古閣加上電影放送，這馬成做當地的觀光景點，遊客聽講地主按算欲來共賣掉，感覺誠意外。
遊客表示：「如果以地方的特色來講，伊確實是一个景點，確實是一个觀光景點，抑若欲講敢有開發的利益，這著愛看建商按怎去看待這件代誌。」
劉氏古厝因為後代序細共同持分的原因，所以千外坪的土地佮古厝，長久以來都無法度整體規畫。2020年捌有人想欲買古厝內底300外坪的土地，毋過落尾無成交。 這改地主家族有共識，按算欲共全部賣掉。
不動產仲介謝先生表示：「是有建設公司想欲共這塊土地，規个攏共起厝的規畫，另外嘛有文創業者想講，欲共這个所在保留，做一个文創的規畫。」
民俗專家謝光銘表示：「共整理予好勢，做文創的地點嘛足好，後擺是觀光的景點，較早是講鬼仔厝，是較早的傳說，這嘛無科學的根據。」
一寡遊客講，劉氏古厝佇臺灣算是誠有名的所在，而且建築物嘛誠有歷史感，若是拆掉是誠拍損，如果會當有閣較完整的規畫，應該對在地的文化佮觀光會帶來幫助。
陳玟芯/編輯
專題｜改造地獄路 台灣行人路為何難行？
