新竹市有一陣國中生，學校趁歇寒時間來到綠島，渡過6工5暝的三鐵環境生態訓練，過程中、毋但愛家己洗衫、煮食，閣愛用水桶、想辦法打造簡單型的船仔，予學生渡過一个難忘的寒假。(本則新聞標題、導言、內文皆為臺語文)
一陣國中學生沿路拚勢騎鐵馬，無論按怎忝嘛愛繼續向前騎，一路若是搪著鐵馬故障，著愛做伙想辦法來解決。
新竹市有一間國中，趁歇寒安排學生來去綠島，做6工5暝的三鐵環境生態訓練。過程中學生著愛家己落手用水桶做船仔，學習佇海上划(kò)獨木船，食暗頓的時間到矣，嘛是愛家己煮。
學生表示：「來遮進前真濟代誌攏感覺是應該的，像逐工攏會當洗身軀，抑是逐頓攏會當食予飽」、「毋捌長時間家己佇外口露營過，我想欲來遮挑戰，來到遮就會感覺，其實佇野外生活是誠無簡單」
學校講活動主要是欲予學生脫離四序的環境，其實囡仔比爸母所想的閣較勇敢，學生會當對過程內底學習解決問題，嘛學著課本以外的智識。
新竹市光華國中校長 林茂成表示：「予學生學著按怎修理鐵馬，學著團體生活，去到綠島學生存的方式」
佇老師的tshuā隊之下，學生完成每一項困難的任務，嘛予學生佇外島度過6工5暝，難忘的寒假。