臺語舞台劇"阮是廖添丁" 3个女性做義賊主角

廖添丁的真面目若是查某的，應該是啥模樣？由導演楊景翔創作的「阮是廖添丁」舞臺劇，講的是三个無仝背景的女性，有魔術師、高中生，也有做人新婦的剪綹仔，做伙做義賊的故事。

導演楊景翔講:「我對這个故事的記持大部份，毋是因為廖添丁這个人的傳奇，是因為我對阿媽、阿母的感情，用轉換性別的方式，然後用一个三个人的團體，去講過去廖添丁的故事，會當紮來閣較新、閣較心適，閣較無仝款的當代廖添丁。」

楊景翔拍破性別的限制、創造現代的廖添丁。故事全程用臺語發音，嘛結合傳統唸謠佮西洋樂器，予老傳奇有新的面貌。演出魔術師的王世緯講，演戲的時陣上困難的就是學看全臺語文的劇本。
 

演員王世緯講:「就是一開始阮是看著臺文的文字，對遐開始，對我來講感覺足有挑戰性，女性廖添丁這个角色，對彼个時代背景來講，女性的觀點真難得，希望予觀眾感受著，語言的滿足、動作的滿足，閣有呈現出來的幼路感情的滿足。」

2023年全新臺語舞臺劇「阮是廖添丁」，3月24到26佇國家戲劇院演出。