環保署推廣環保夜市 望民眾也通兼顧減塑分類
鄭雅文、林郁凱/台北報導
發布時間：
更新時間：
目次
這幾冬環保署推動環保夜市，今年有台南復華夜市等等入選環保夜市，環保署也表示欲佇明年進一步公佈環保夜市的指引，包括糞埽分類、減少使用塑膠碗等等，希望全國夜市攏通往這个方向改進，予民眾踅夜市也通顧環保。
夜市除了有好料通食，真濟店頭、擔仔也開始注意環保，親像改用重複使用的餐具、設排油煙設備等等，嘛響應政府的減塑政策。
羅東夜市總幹事 張格逢表示：「人客入來的時，阮有囥分類箱仔予擲糞埽，上和別人無仝的是阮有一个糞埽集中場，派專人分類。」
環保署表示，這幾冬除了推動環保夜市，也會公布環保夜市指引，制定各類環保項目，除了規範入入選的環保夜市，也會予市民票選需要改進的夜市，希望全國的夜市攏通提升品質，預計明年頂半冬就公布。另外疫情轉和，真濟夜市表示生理有漸漸恢復正常。
墾丁大街夜市主委 曾春惠表示：「阮的人潮回流大概有六七成，歇熱的時是真正袂䆀，這馬因為是落山風季，所以人較少淡薄，但是連假攏袂䆀。」
羅東夜市總幹事張格逢表示：「這馬阮的遊客已經漸漸轉來差不多八成左右，已經轉到以前的水準。」
閣來就欲迎接元旦連假，各地的觀光夜市也真期待。這改的環保夜市選拔，是透過民眾票選佮秘密客查訪，入選前十名的環保夜市，除了特優的台南復華夜市，閣有墾丁大街夜市等等。
專題｜改造地獄路 台灣行人路為何難行？
