18歲公民權無過 民團指宣傳無夠.修憲難度傷懸

11月26的18歲公民權修憲案，結果無通過。有民間團體佮學者認為，中選會等等機關宣傳無夠，是其中一个原因。

中選會綜合規劃處處長高美莉表示：「透過多元管道宣傳，譬如透過line 面冊來宣傳，其他猶有透過廣播，印海報到每个地方政府。」

台少盟副秘書長林于聖表示：「中選會第一个是宣傳的問題，真濟人到選前攏毋知這擺有修憲案，甚至提著選票才發現，這件代誌無完全是中選會的責任，阮去拜會真濟行政部門，得著的答案攏是講，In無方便表示意見，毋過這真奇怪，立法院全票通過的代誌，行政部門為啥物袂使幫阮宣傳。」

另外，修憲案的公民複決程序，除了同意票愛懸過無同意票，閣愛超過整體投票權人二分之一，這擺同意票，只有整體投票權人的29.35%，修憲的戶橂傷過頭懸，也成做焦點。釋憲是目前各界認為有可能解決的辦法之一。

輔仁大學法律系助理教授姚孟昌表示：「要求大法官對修憲戶橂進行判斷，是真困難的，但是若換一个角度，佇這擺的投票當中，有超過40萬的中華民國國民，伊的公民資格佮投票權利予剝奪，In就有權提起憲法訴訟。」

學者指出，外界認為會使由立法院提出釋憲，但是這著愛立法院有因為現行法律，造成職權無法度施行才會使得。學者認為，因為目前立法院確實有順利提出憲法修正案，所致這條路可能行袂通。