教育部佮農委會推出「學生囡仔食石斑」政策，欲解決中國禁止臺灣石斑進口的問題，毋過目前煞出現供應袂赴，這學期可能會跳票。雖然有立委建議用白帶魚來替換，毋過農委會主委陳吉仲是講，刺仔的問題若通解決，學校會當另外增加各種的海產；抑若石斑的部份，這陣閣咧拍拚調度。
提農產品行佇舞台頂，遮的攏是透過符合企業社會責任CSR的採購流程，所做出來的產品。農委會24召開記者會，感謝遮的企業透過CSR，幫助農民有穩定的收入，也承諾繼續推出平台，媒合有意願的企業。
農委會主委陳吉仲表示：「有閣較濟企業，幾百間已經佮農委會表達，願意做相關CSR的採購，咱的目標真簡單，予產地價數維持一定水準，予農民收入比成本懸。」
農產品拚內銷，外銷拄著的問題也著解決。進前中國禁止台灣的石斑進口，落尾白帶魚等等也受著限制。政府宣佈全國國小、國中，這學期通食4擺石斑的政策因應，但是現此時供應煞出問題，猶有部份學校食無著。有立委早起建議以白帶魚來替換。
農委會主委陳吉仲表示：「石斑另外提供予學校，中晝頓會使加出一項以外，未來的學校中晝頓，本來就會使增加水產品的供應，只要魚刺這款問題會使解決。」
陳吉仲表示，目前石斑的部份當咧拍拚調度，但是每一个縣市的進度無仝，猶愛看狀況。原底捒班班吃石斑政策，欲用內銷解決外銷的問題，目前煞因為供貨問題卡關，顛倒咧考驗這个政策敢會跳票。
