11月26，除了欲選縣市長和議員，閣有18歲公民權修憲案的複決公投。有民間團體調查顯示，民眾對18歲公民權的支持度有提升，不過也有4成外的民眾，毋知影有這個公投。
離九合一大選賰32工，除了地方公職人員選舉，閣有18歲公民權修憲案的複決公投，愛965萬票才通通過。根據統計，猶有16%的中間選民，猶無決定敢欲投下同意票。
臺灣青年民主協會理事長張育萌表示：「這嘛是台灣頭一擺，台灣人家己做陣決定，咱的憲法敢有欲修正，台灣當咧進行一場真大的世代正義，世代溝通的運動。」
這擺統計佇10月份調查，佮頂擺8月份的調查相比並，民眾支持度有增加。但是整體猶有42.1%的民眾，毋知影有18歲公民權修憲案的複決公投。
台少盟副秘書長林于聖表示：「佇3月25立法院投票的時，是109票比0，全部的主要政黨攏投同意票，無任何人反對，逐家攏公開表態18歲公民權這題，是毋是咱各主要政黨，逐家愛繼續拍拚，予咱的支持者知影有這个公民權的投票。」
臺灣青年民主協會理事長張育萌示：「2017年咱修公投法，共過去公投的年歲，對20歲降到18歲，民法的20歲成年也修做18歲，明年的元旦就欲上路，一路上就是希望，台灣成年年歲會使一致化。」
民間團體表示，除了會佇紲落來一個月的時間繼續宣傳，嘛呼籲各政黨佮候選人，應該積極說服選民投同意票，達成1000萬張同意票的目標。
