龍骨損傷半遂少年化 病友招12/10遊行伨勇敢

坐佇輪椅頂頭拍羽毛球，對國手胡光秋來講，是經過幾若冬的訓練才累積起來的成果。12歲的時，因為開刀傷著龍骨的神經，從此以後伊的人生攏愛佮輪椅縛做伙。毋過伊講羽毛球予伊的人生有向望。

亞帕運羽球輪椅選手胡光秋表示：「我足歡喜我會當對興趣到這馬，變成一个競技的選手，代表臺灣去參加各項國際比賽，我想欲予人知影，阮其實真有能力，甚至比別人做甲閣較好。」

根據脊損社會福利基金會統計，臺灣龍骨受傷的病友，有愈來愈少年化的趨勢，其中有72.1%的病友原底是厝內主要的經濟來源，受傷了後無法度繼續做原本的工課，所以大部份攏是倚靠政府補助佮民間團體的幫忙，這回in舉辦「伨勇敢WeGoTogether」記者會，就是希望社會會當加關心遮的病友。

脊椎損傷社福基金會董事長林進興表示：「阮事實上真希望，社會大眾會當了解龍骨損傷，因為了解，所以會予in閣較濟協助佮支持，嘛因為支持，所以予逐个病友會當更加勇敢去面對，生命當中每一工的挑戰。」

「伨勇敢WeGoTogether」，邀請民眾一人一句話，支持遮的龍骨受傷的病友行出來，陪伴in佇12月初10彼一工，對臺北市政府出發，用輪椅行出一公里的希望。