北市府雙十升旗 柯文哲呼籲政治人物團結臺灣

臺北市府10/10今仔日早起嘛佇市民廣場升旗,市長柯文哲呼籲政治人物愛盡力,予臺灣更加團結。國民黨彼爿,是佇中央黨部辦活動,前總統馬英九是批評,蔡英文用"臺灣",取代中華民國,會予兩岸關係愈來愈害。

「中華民國,生日快樂!」
慶祝中華民國臺灣生日,國民黨佇中央黨部舉辦升旗儀式,除了前總統馬英九、黨主席朱立倫、國民黨臺北市長候選人蔣萬安以外,前國民黨主席吳伯雄、郝龍斌嘛來到位,針對蔡英文用「臺灣國慶日」取代「中華民國國慶日」,馬英九表示按呢做會予兩岸的情勢更加緊張。
前總統 馬英九表示:「舊年國慶日,總統強調兩岸互不隸屬,而且推動臺灣國慶日,中華民國無去矣,蔡總統遮的做法、遮的動作,毋但袂當團結人心,閣會刺激大陸惡化兩岸情勢。」
黨主席朱立倫徛出來伨馬英九,強調「中華民國」這個稱號,必須愛堅持,臺北市長候選人蔣萬安嘛贊聲,呼籲蔡英文毋通刁工迴避中華民國這四字。另外一爿,臺北市政府佇市民廣場舉辦國慶典禮,市長柯文哲講,無希望國慶日變成一个臺灣分裂的日子。
臺北市長 柯文哲表示:「本來國慶日就是一个予全國會當團結做伙的一个日子,我是真無希望這个日子變成一个分裂的日子,出來社會佇一个不仝的位,猶是愛盡自己的力量,予臺灣是一个更加團結、更加和諧的社會。」
中華民國臺灣111歲國慶日,國民黨民眾黨除了做伙慶祝以外,嘛提出家己對國家的期待,希望團結堅守主權、莫引起兩岸的紛爭。
 

相關新聞