蔣萬安說飼囝政見 喝提懸生育獎金.提供社宅

佇咧台北市內湖親子餐廳，國民黨台北市長參選人蔣萬安8/25召開記者會，提出育兒政策。包括生育獎勵金欲比現行台北市政策閣較濟；公立托嬰中心全額補助、私立提懸補助；閣提出生第兩胎的家庭優先蹛社會住宅、而且降低租金的政策。

國民黨台北市長參選人 蔣萬安表示：「對目前台北市政府財政，袂有傷大的負擔，但是伊所創造的價值，佮阮想欲達成的目標，是絕對絕對會值得」

台北市副市長黃珊珊佇文山區的小學出席雙語教學活動，講著蔣萬安的政策，伊認為發錢毋是解決生育問題的唯一方法。

台北市副市長 黃珊珊指出：「財政紀律猶是非常重要，按怎共台北市的義務教育往下釘根，包括五歲的義務教育，三四歲甚至阮希望列入免學費，重點是咱欲投資學校，投入佇托育的師資，比單純發錢更加重要」

另一方面佇咧北投區，民進黨台北市長參選人陳時中早時拜訪議員林瑞圖，陳時中進前才去文山區拜訪新黨籍議員李慶元，這擺閣向無黨籍的林瑞圖，積極拓展支持。

民進黨台北市長參選人 陳時中 & 市議員 林瑞圖：「盡量就愛了解嘛，市政這確實市政足複雜的，你看你有才調去拜訪新黨，我就感覺足厲害的」

林瑞圖當面呵咾陳時中，毋過面對媒體詢問，台北市長參選人三跤㧣會伨佗一个？林瑞圖無講予明，干焦講會看啥人上有心欲開發地方，而且是真正有行動的。