89歲藝師楊秀卿過身 一生為唸歌奉獻拚傳承

文化部指定的「臺灣說唱藝術」保存者,唸歌的人間國寶—楊秀卿,今仔日透早別世,享壽89歲。楊秀卿老師定定講:「以前唸歌是為生活,這馬唸歌是為文化。」楊秀卿老師的唸歌功夫超過70年,自廟口、廣播到文化場攏有楊秀卿唸歌的形影佮作品。楊秀卿毋但配合政府共經典的歌仔故事保存落來,也配合臺灣的電影、MV佮表演藝術做迒領域的結合,傳承濟濟徒弟來唸歌,希望共有母語文化的唸歌,繼續開枝散葉。

過身唸歌藝師,楊秀卿表示:「我第一希望就是講,予我的身體較勇的,我會當加食幾年,學生加教一寡,我這个藝術會當甲傳較久的。」

一生奉獻唸歌表演佮教育傳承的國寶楊秀卿女士,17半暝過身,享壽89歲。

楊秀卿結業藝生,儲見智表示:「老師的離開,等於是彼一頁已經掀過去,其實咱的根本就是佇楊秀卿老師𪜶這代,𪜶才是真正有接觸到傳統輝煌的彼个年代。」

對楊秀卿的離開,伊的學生儲見智感覺真毋甘,也表示楊秀卿近年來就算目睭看無、跤路䆀,猶原綴學生四界推廣唸歌。因為伊捌講過這句話,少年唸歌為生活,老矣唸歌為文化。

過身唸歌藝師,楊秀卿表示:「這是咱台灣的文化,哪會使去予絕版去。」

楊秀卿自13歲就四界走唱,後來拄大環境影響事業,就想講欲予大眾聽有,就改編歌仔戲的曲獨創口白歌仔,行遍全台,伊佇1989年得著教育部民族藝術薪傳獎、2003年提著文化總會的終身成就獎、2009年文建會認定伊是重要唸歌保存者、舊年也會獲頒第40屆行政院文化獎。

楊秀卿學生,儲見智表示:「伊毋但是台灣傳統唸歌藝術的𤆬頭者,也是先行者,伊共伊做了改編創新。」

行過唸歌無仝時期的楊秀卿,傳藝的工作攏無停過,伊的過身象徵一个時代的過去,文化部表示,會全力協助家屬辦後事,嘛會呈請總統明令褒揚。

全台敬老金大調查

相關新聞