臺北迪化街百年老厝重生 延續稻米歷史文化

本底是迪化街的米行也是台北市歷史建築，這馬是民間經營的餐廳，內底空間保留真濟米行的家私。

業者 葉守倫指出：「可能來阮遮用餐的人客，阮攏會參伊導覽紹介，伊毋是講干焦來用餐爾爾，伊會當共在地的故事紮走，分享予閣較濟伊的朋友」

除了米行變餐廳，原底附近的漢藥店空間嘛由賣群眾募資商品的文創業者接手，台北市的老厝文化運動，這馬閣增加兩位新所在，市府表示，以公私協力共老厝翻修再利用，預計到年底有廿二間厝。

台北市副市長 蔡炳坤表示：「阮市府佇這个計畫內底，提供予廠商包括伊的這个營運費的費用，包括租金，甚至房屋稅、地價稅等等，攏會使抵扣修復的經費」

相關租稅減少吸引業者投資，市府表示，目前佇台北市有五百幾項文化資產，其中有百外項佇大稻埕，真濟是老厝再利用，希望民眾透過老厝活化，了解四箍圍仔的歷史，也通感受新氣味。