公視片庫資料予外包商刣掉 8萬外筆無法度復原
郭柏均 謝季潾 / 台北報導
發布時間：
更新時間：
公視新聞數位片庫有幾落萬筆採訪畫面，去予外包廠商刣掉，引起社會關注。各黨派的立委攏對這件代誌提出質疑。文化部長-李永得表示，目前當咧調查，會佇一個月內提出調查報告。公視嘛表示，會成立鑑價小組愛廠商賠償。
公視新聞數位片庫，因為外包廠商的疏失，幾若萬筆的新聞採訪畫面雄雄消失，引起外界關注。16文化部長李永得、到立法院進行業務狀況報告，各黨派的立委對這件代誌攏提出質疑。
國民黨籍立委 萬美玲VS.文化部長 李永得，「若是今仔日毋是民眾爆料，是毋是這件代誌就予人掩崁矣。」「其實這嘛猶有真濟親像你拄仔講的，這件代誌是不可思議的代誌，這內面一定有原因佇咧，應該毋是真單純一个人員操作的過失，伊一定猶有真濟其他毋管是系統的設置，包括備份的原則抑是操作原則抑是程式的保護，所以阮這馬是請專家去實際了解。」
文化部表示，會佮NCC、行政院資安處成立專案小組，一個月以內提出調查報告。公視新聞片庫意外影響範圍包含公視、公視臺語台、客家電視台。公視表示，目前猶有8萬4千外筆的資料猶無法度復原，目前受影響的部份若有需要，會以新聞部的業務經費向華視來買。
公視代總經理 徐秋華表示，「初步會請求廠商恢復片庫所有設備所需要的費用，至於消失資料的鑑價佮紲落來追加起訴的部份，阮嘛會進行。目前董事會嘛按算成立鑑價小組，請專業的顧問會同律師認定求償金額。」
李永得表示，目前公視內部已經有懲處的名單；針對公廣集團內的其他單位，目前嘛當咧了解in資料儲存佮備份的狀況，未來嘛會提出報告。
2022杭州亞運 台灣百金之路
