北榮玉里分院 社區式照護.助精神障礙者行入社會

根據衛福部的資料,舊年佇臺灣有提第一類心智科、身心障礙認定手冊的超過35萬人。全臺灣規模上大的精神病院─北榮玉里分院,這幾若十年來,用四階段的職能復健,打造一个在地化的社區式照顧,協助學員轉去社區會當家己生活,這效果已經受著國際肯定。

鑼鼓聲響,佇台頂表演的秀姑巒鼓隊,是北榮玉里分院捌因為精神方面問題破病的學員。

臺北榮總玉里分院職能治療師曾一芳:「in大部分攏是精神科的病人,主要攏是咱較早講精神分裂症。但是這馬講思覺失調症,人講台頂一分鐘,台跤十年功,就是像阮按呢。」

這陣學員的故事也被拍做微電影,紀錄玉里分院這三十年來,替身障者打造四階段職能復健,對復健中心、庇護工作訓練、康復之家到社區家園,全部包辦,逐年協助大約10%康復之家的住民,轉去社區獨立生活。

臺北榮總玉里分院代理院長胡宗明:「第一个佇院內的職能治療,去訓練伊的手眼協調,去看伊會當做佗一寡工課。到最後一階段,到職業復健的模式進前,阮就是去媒合,看伊欲做啥物職工課。」

微電影導演方英海:「一般的醫生我看著的,是救人的命;玉里榮院遮的醫生,救的是人的性命。彼是無仝款的物件,彼个程度和內涵是閣較厚的。」

北榮玉里分院是全台灣上大大規模的精神病院,這陣收大約2000人,逐年協助大約30位有機會成功復健的學員,去康復之家進一步訓練,透過全方面支持,幫助身障者重建生活,包括美國、澳洲、韓國、印度的精神照護專家,攏曾來分院交流,成效受國際肯定。

相關新聞

專題|全台敬老金大調查