今仔日是國際婦女節，衛福部佇今仔日辦展覽，通看著咱臺灣佇各領域的女性，為環境保護拍拚的成果。
用牛仔布車的鉛筆袋仔佮飲料杯袋仔，看起來真四常，毋過這是回收廢棄的牛仔褲所做，毋但環保，製作者是二度就業的婦女，婦女團體嘛協助提供in相關的訓練課程。
婦女新知基金會監事 蕭姮姝表示：「就培養in、教in美感猶閣有色感，全部攏對頭教起。Tshua7領這群毋捌出門的婦女，有時陣閣tshua7家己的囡仔來上課」
另一爿是佮連鎖咖啡店合作，共原底貯咖啡豆的麻布袋仔，交予婦女重新製作的文創商品。
蘆葦女力執行總監 洪寧表示：「廢棄麻布袋仔阮是特別請中高齡婦女，抑是特殊狀況的婦女，對布有興趣的阿公阿媽，In會使閣一擺投入工課場」
衛福部佇3月初8婦女節，為這群替環保盡心力的女性辦展覽，希望大眾看著台灣女性佇環保上的努力，嘛綴國際趨勢鬥陣行。
衛生福利部次長 李麗芬講：「淨零台灣女力行動，其實這个主題嘛是咧呼應今年聯合國的婦女地位會議，講的就是咱愛推動女性的性別平等，然後愛創造永續的未來」
開展記者會嘛播送總統蔡英文佮行政院長蘇貞昌的祝福影片，除了慶祝婦女節，嘛講著2050年淨零排放的目標，感謝來自台灣各領域的女性做伙拍拚。