臺北抽驗20間手工圓仔擔 防腐劑標示攏合格

元宵食圓仔、慶團圓,也食平安,台北市衛生局最近特別抽查超市、大賣場、菜市仔賣元宵的店家,看內底的餡防腐劑敢有超標,計共驗20件,攏合規定。

北市衛生局食品藥物管理科科長 陳怡婷指出:「烏麻仔的抑是講塗豆的,鹹圓仔的,猶閣有烏秫米的,來驗伊的防腐劑,猶閣有伊的彼標示。會看敢有佮法律相仝,這廿件內底攏合格」

衛生局提醒挲元宵的時,手和環境的衛生猶是愛特別注意。
另外,衛生局也公布2021年食品、藥物、化妝品和醫療器材無老實、違規廣告產品,計共619件,裁罰超過4500萬,其中食品上濟,超過300件,主要宣稱有提升免疫力功效佔上濟,閣來是強調減肥和顧目睭的效果。

陳怡婷表示:「愛提醒逐家較注意咧,若是你留電話抑是講email,你真正欲揣人,欲退貨的時陣攏揣無人,彼其實這種廣告的商品就莫閣買矣」

衛生局表示會繼續稽查,若有食品廣告傷過譀、用字解說無清楚等等的產品,會照食安法上重罰500萬,也提醒消費者買賣進前,產品標示和營運資料攏愛看詳細敢有標清楚,莫予人騙去。

全台敬老金大調查

相關新聞