高雄港相關加1例 病例厝內人隔離期滿陰轉陽

初七透早高雄港碼頭佮貨櫃中心篩檢站，出現真濟人排隊等欲篩檢，市府這兩工佇港區設置八个篩檢站，要求港區人員開工進前全面篩檢，若無就袂當入去港區做工課，毋過高雄猶是增加一位確診者，是進前港區人員的家屬，解除隔離的時陣才發現確診。

高雄市衛生局簡任技正潘炤穎：「伊的感染源主要是18490，是蹛做伙的厝內人。伊的CT值30.4，匡列時間是1月24，2月初6隔離第13工採檢。」

市府表示，初七新的確診者較無社區傳染風險，毋過初六出現放港確診，予市府較緊張，目前箍列的人採檢攏無問題，因為確診的放港捌接觸40隻船攏離開，欲調查感染源誠困難，若是共其他放港的攏箍入來，外界煩惱會影響著高雄港的運作。

中華民國引水協會理事長胡延章：「伊若是有其他放港予匡列，放港的人數就會減少，會當做工課的人數減少。減少的量若較大淡薄仔，高雄港可能變誠慢，抑是停止運作攏有可能。」

理事長表示，佳哉這位放港是歇睏三工的時陣確診，高雄港這兩工會召回全部放港轉來篩檢，紲落來閣愛第2擺篩檢，希望開工了後疫情袂閣擴大。