嘉義蘭潭國小教天文 學生體驗用千里鏡看日頭

天文小老師說明看日頭進前愛注意的重點和方向，嘉義市的蘭潭國小，是嘉義市內唯一有天文台的國小，學生攏有機會來天文台學習天文智識。

蘭潭國小 林同學表示：「我對幼稚園大班就開始學天文，閣來就對天文誠有興趣」

蘭潭國小天文學老師 侯宜呈講：「予IN透過這款活動，先知影太陽頂面有一寡物件會當觀察，按呢去吸引囡仔的好奇心，IN就會家己去學閣較濟的智識」

沓沓仔展開的天文台，囡仔攏感覺誠心適，學校特別利用社團活動的時間，予囡仔來使用千里鏡，來學習相關的天文智識。

蘭潭國小校長 邱榮輝指出：「科學智識佮看著的相片，有閣較真實的連結，所以阮透過這種課程，毋但會當學習天知智識，嘛會當學習天文台千里鏡的操作」

千里鏡佮電腦數位的結合，會當清楚閣詳細記錄天文科學的變化。老師表示，科技改變過去學習的內容，嘛予有興趣的囡仔，會當學習著閣較完整的天文智識。