國家電影佮視聽文化中心，是臺灣唯一專門負責典藏修復電影的單位，文化部佇2020年共伊轉做行政法人機構，典藏欲2萬部的電影膠片和30外萬件文物，今仔日正式佇新莊開館。
台語歌王文夏佇1969年現身佇伊的第十齣電影《再見台北》片頭，紹介頂齣劇情，國家影視聽中心修復濟年的成果，一月初七新莊開館的這工，總算佇符合國際規格的電影廳播送。
國家影視聽文化中心董事長 藍祖蔚表示：「過去44年來，前輩守護國家的影音資產，四界流浪、寄人籬下，真無簡單今仔日咱有家己的厝」
總統 蔡英文到場發表致詞：「我相信經典是袂退色的，對影視聽中心，對台灣電影工作者的支持，阮絕對袂共跤步停落來」
新北市長侯友宜也到場攏肯定這40外年來電影界的拍拚，行政院長蘇貞昌嘛表示二期欲起博物館和片庫的工程預算54億，中央絕對會盡力相伨。
行入常態性展覽區，除了有1956年薛平貴和王寶釧劇本手稿，猶有辛奇導演、大俠梅花鹿、第一屆台語片影展特刊相關文物手稿。
國家影視聽中心執行長 王君琦指出：「舊年咱就有處理台語片，數位修復兩齣。一齣是龍山寺之戀，白克導演的作品；一齣是流浪三兄妹。所以今年咱就會繼續修復台語片，咱的計畫是修復三齣台語片」
王君琦表示除了數位修復台語片，也會做數位化，希望保存這寡實景實地拍的片，予後輩透過台語片感受台灣文化。