中正紀念堂轉型 民團:儀隊徙位操演著代先做
郭柏均 張育睿 / 台北報導
發布時間：
更新時間：
促轉會九月提出共中正紀念堂規劃做「反省威權歷史公園」的想法，今仔日 (12/21) 民間團體也進一步提出看法，包括佇銅像徙走進前，先共大門關起來，儀隊嘛著換所在操演。
促轉會九月公布中正紀念堂轉型方案，計畫共園區轉做反省威權歷史公園，移除包括蔣介石銅像等等威權象徵，按算佇明年向外界說明詳細方案。民間團體今仔日進一步建議，佇銅像徙走進前，愛代先有其他措施。
台灣二二八關懷總會理事長王文宏：「佇猶未徙走進前，中正廟大廳的大門應該暫時關起來。三軍儀隊長期佇中正廟大廳來操演，對威權者的崇敬儀式，這完全違反臺灣成做民主國家的形象；應該共伊徙到自由廣場牌樓下底。」
台灣人權促進會秘書長施逸翔：「阮非常想欲知影，到底這个方案 (反省威權歷史公園)啥物時陣，猶閣如何真正來轉型？」
民間團體批評，韓國無欲替有威權爭議的總統全斗煥辦國葬，西班牙嘛共國內獨裁者佛朗哥的銅像攏拆除。但是台灣的威權象徵，煞猶是用國家的力量咧維護。針對民間的建議，促轉會嘛提出回應。
促轉會發言人陳雨凡：「譬如儀隊的展演徙去廣場進行等等，阮進前嘛有類似的想法，阮也贊成。佇規个轉型猶未具體落實進前，各主管機關、文化部等等，逐家攏來共同參考遮的配套建議。」
促轉會表示，詳細方案會佇明年五月提交予行政院。佇明年3月左右，會向大眾收集轉型相關的建議，以圖樣展現予民眾了解轉型後的模樣。
2022杭州亞運 台灣百金之路
