公投投票率只41% 學者:政黨對扴亂議題焦點

昨昏是四大公投案的投票日,毋過投票率干焦4成爾爾,也全部攏無成案,是按怎民眾投票的意願無懸咧?有學者指出,包括政黨相觸,擾亂議題重點,閣有公投成案到投票這段時間傷短,予民眾袂赴思考,攏是造成民眾放棄投票的原因。

四大公投攏無過關,投票率只有41%,第一改純公投,並3冬前的公投縛大選投票率超過五成閣較低,有人認為公投議題變做政黨對決是上大原因。

公民監督國會聯盟執行長,張宏林表示:「足濟議題凡勢咱民眾,到這馬攏毋知欲投啥,當然毋是一咧好代誌,原本咱講投代誌是欲好好仔去思考,煞變做政黨的對決,當然對咱台灣社會民主深化,我感覺毋是一件好代誌。」

公督盟指出,政黨直喝口號,予代誌的思考親像干焦賰是非兩个選項,是真濟民眾放棄投票的原因。嘛也有人講問題是出佇這改公投無縛大選;毋過有學者表示,全國性的公共議題本底就無應該參政治濫做伙,也應該參考國外,延長消敨議題的時間。

東吳大學政治系兼任助理教授,彭睿仁表示:「像瑞士的公投,超過一冬以上的狀況攏是有的,甚至瑞士的一寡具體做法就是,為著予民眾真正參與公投,當然猶是有全國性公投,但是盡量減少因為選舉佮政黨的因素,去影響著全國性的公投,所以全國性的公投,袂佮大選年縛鬥陣。」

另外,投票的結果有人認為是執政黨期中考試的勝利,毋過若看較幼,民進黨地方執政的桃園、基隆、新竹等等,四个公投案的同意票攏占較濟。

公民監督國會聯盟執行長,張宏林表示:「雖然有分輸贏,但是差別無大,不管是欲補選,抑是罷免的部份,攏是愛閣去做閣較濟的拍拚。」

公督盟表示,雖然這幾項政策對公投結果看起來,民眾決定支持政府,毋過對票數的差距看起來,也顯示公共政策的執行,著愛閣較頂真佮細膩。

全台敬老金大調查

相關新聞