中央大學太空佮遙測研究中心，對1995年開始，逐年攏會用無仝主題做「衛星影像」月曆。上新的一本，結合12齣電影的場景，透過衛星圖，記錄遮的地景變遷
導演梁修身：「這个人參這馬這个人，有差真濟嗎，是仝一人」。
電影春寒(tshun-hân)，佇1979年到台中太平山取景，看著這馬的衛星圖，導演梁修身，就真有感覺。這是國立中央大學，新出的2022《衛星影像月曆「遙電影」》，選12齣經典影片、對照這馬衛星所翕的地景風貌，感受時代的變遷。
中央大學太空佮遙測研究中心教授蔡富安：「這是1972年nasa landsat1，landsat是土地觀測的衛星的意思，較早的海埔新生地，這馬攏變成坉海造陸的工業區，規个發展也完全無仝」。
教授講的是電影《養鴨人家》取景的彰化線西地區。中央大學太空佮遙測中心，利用通翕50公分級、超懸解析影像的地球觀測衛星(Pléiades)，搭配3D測繪技術，佇台灣各地留下紀錄。
中央大學文學院長林文淇：「地景是揣逐家較熟似的，抑是佇電影的呈現足有特色，衛星相片佇月曆的結合上，阮愛考慮伊看起來，整體效果看起來會較好」。
太遙中心表示，IN自1995年開始，逐冬攏會以無仝主題，製作衛星影像月曆，除了紀錄環境、生物族群分布、閣有天災的受災區域分析等等，提供故鄉變遷的紀錄。