臺語囡仔歌專輯"春天佇佗位" 出版繪本拚推廣

十五年前,有一張入圍金曲獎的臺語囡仔歌專輯《春天佇佗位》,最近特別用臺語繪本的形式出版,用圖佮音樂𤆬囡仔熟似臺語。

「𪜶兩个佇客廳𨑨迌的時陣,聽著機器人-阿博仔,咧放𪜶上愛聽的囡仔歌」

故事對姊弟仔揣春天講起,15冬前的台語囡仔歌,這馬成做繪本,𤆬大人囡仔來回味。

新銳畫家,鹿雅表示:「用小金英飛過來,然後𪜶坐上葉仔,然後沓沓仔順水流,這一面也是藏有一寡小動物。」

插圖畫家鹿雅,融入真濟台灣地景佮動物、予囡仔感覺綴咧去旅行、感受主角的活力佮春天的生命力,故事是歌詞的延伸,予囡仔透過音樂佮尪仔做伙去冒險。

音樂劇製作,謝漢克表示:「阮是發覺講,佇推廣上可能有一寡爸母,台語可能也毋是真輾轉,所以阮希望講,阮做一个像導讀的物件,但是阮閣無想袂做甲傷硬。」

作者,黃靜雅表示:「這條歌陪伴囡仔大漢,這是我本來的心願,但是除了歌以外,𪜶敢是會當閣學閣較濟的台語,抑是講透過這个看繪本的方式,予IN有閣較深的印象。」

台語囡仔歌陪伴囡仔做伙大漢,春天佇佗位佮進前專輯的別條歌曲,也因為合作團隊的拍拚,成做台語音樂劇,黃靜雅講,其實目標毋但出這本繪本爾爾,也希望其他的囡仔歌也通照這種模式,深入IN的生活,予學台語閣較趣味。

相關新聞

專題|全台敬老金大調查