臺日大學聯盟今成立 推學術交流.拚地方創新

臺灣佮日本這幾年攏咧面對人口老化、少子化,和郊區人口流失問題,教育部和科技部對兩三冬前開始,籌備臺日大學聯盟,今仔和日本簽聯盟MOU,臺灣有6間學校、日本有4間學校合作,希望強化臺日高等教育之間的交流,也拚在地創生。

共塗裡挖出來的朱榔、切角、囥落去煮,用伊天然的色素染漁網,通增加網仔的強度,這是往過八斗仔漁民的智慧。國立臺灣海洋大學學生2017年加入教育部大學社會責任計畫,和八斗仔產業觀光促進會做伙提出振興漁村產業相關計畫,教民眾用朱瑯染布,未來學生有可能去日本高知大學交流。

國立臺灣海洋大學副校長莊季高:「日本其實有和幾若間學校有簽約,和幾若个縣市嘛有簽約,in做地方創生做足濟年,所以足有經驗,阮也希望老師佮學生鬥陣去學習」。

咱的厝邊,日本仝款面臨類似城鄉發展那來那遠、人口外流、老化和少子化siáu-tsú-huà的社會問題。為著強化學生對解決社會問題和推動地方創生的能力,教育部和科技部佇2019年共同成立「臺日大學聯盟籌備處」,結合台灣6間、日本4間大學,佇16這工正式簽聯盟備忘錄。

教育部USR中心總主持人蘇玉龍:「我相信臺日大學聯盟,會當替臺灣和日本的地方創生,增加新的活力,也期待在場十所聯盟的學校,成做臺日各大學實踐大學社會責任的表率」。

日本台灣交流協會理事長谷崎泰明:「佇地方創生上日本和臺灣,攏有相siāng的大問題,透過互相拍拚,期待會當進一步強化原本的關係」。

教育部表示,這改主要入選合作的台灣學校佇USR計畫攏屬於深入在地、地方創生計畫,會先和日本簽五年,望提升台日高等教育實踐地方連結的能量。


 

相關新聞

專題|全台敬老金大調查