機車閃違規停車 害外送員趨倒絞入公車軋死

新北永和早起發生一件死亡車禍,有一台旅行車違規擋佇紅線。欲駛走的時陣,一隻oo-tóo-bái雄雄減速,後壁的外送人員袂赴反應,去摖著彼隻oo-tóo-bái,tsua̋nn摔對倒爿塗跤去,後壁公車袂赴擋,外送人員tsua̋nn絞入去公車下底。送病院也救無轉來。亂停車的汽車、oo-tóo-bái佮公車運將,這三个人攏hőng照過失致死罪移送法辦。

一台銀色旅行車,臨時停佇紅線一段時間,才今仔欲起行的時陣,一隻直行的機車,趕緊減速,後壁的外送員,閃袂離,摖著oo-tóo-bái摔對路中央,tsua̋nn絞入去公車下底。

記者問:「你有聽著挵著的聲無?」目擊者:「有啊,真大聲啊,警察一下仔就到位矣。」

現場搝封鎖線,警消動員,緊共人救出來,進行採證,毋過送病院了後猶是宣告死亡。這个死亡車厄發生佇19早起9點外,警方表示,外送員經過新北永和中正、永利路口的時,頭前的機車若像是欲閃彼台違規停的車,雄雄減速,毋過外送員來袂赴反應,才會摖著oo-tóo-bái摔對路的去。

新北市永和警分局交通組長莊博丞表示:「有兩台重型機車,若像是欲閃路邊一隻欲起行的復康巴士,兩隻機車摖著了後,姓張駕駛人倒佇地了後,去予後壁的大都會客運公車挵著,送病院了後不幸死亡。」

代誌發生了後,違停的旅行車,伊做伊駛離開現場,警方依法告發肇事逃逸、違規停車等等交通違規,而且依涉犯過失致死罪嫌函送地檢署偵辦,有律師指出,往過實務上,車禍事故當中,鑑定結果,違規停車若是造成車厄的其中一个原因,仝款愛負過失的責任。

律師施宥宏表示:「違停的旅行車是造成機車騎士或者汽車駕駛,造成傷亡的一个主要的原因,可能無到百分之百,毋過至少嘛有百分之20的原因,伊需要負責,因為伊停佇遐就是違規的行為,這个行為就是過失,不當的行為。」

其實,2年外進前,南投有民眾為著閃違停的車,行佇車路的,煞去予消防車挵死,違停駕駛hőng判3個月徒刑。駕駛因為一時方便違規停佇路邊,毋但愛食罰單,若造成車禍,可能閣愛面對刑事佮民事責任。

 

相關新聞

專題|全台敬老金大調查