風颱"圓規"當過巴士海峽 拍算今暝發海上警報

第18號輕度風颱圓規,漸漸通過巴士海峽,氣象局指出,明仔載、後日,風颱離台灣上近,路線若無變化,下暗就會針對巴士海峽發佈海上警報。另外,受著外圍環流佮東北風的影響,沿海的海湧會誠大,東半部及北部山區會落雨,民眾著愛特別注意。

獅子山風颱已經減弱做熱帶性低氣壓,台灣南部受著風颱外圍環流的影響,海邊仔起大湧,墾丁南灣透早,湧有甲3米懸,有民眾趁好天,袂少人落水去跙湧。

墾丁跙湧教練阿水表示:「因為風颱的影響,(南灣)的湧有甲欲2个人的懸。」
跙湧民眾:「海湧的情形真適合初學者練習,濟濟高手攏佇遐咧跙湧。」

把握時間耍水,因為紲落來,圓規風颱漸漸通過巴士海峽,外圍環流會對台灣附近海域帶來影響,若是路線無改變,氣象局會針對台灣南爿巴士海峽發佈海上颱風警報,另外,受著東風沉降的影響,西半部天氣燒熱,苗栗捌出現38.3度極端的懸溫。

氣象預報員林秉煜表示:「10/10苗栗縣上懸溫出現38.3度,新竹縣市也出現37.7度的懸溫,上主要是因為受著東風沉降作用的影響,預估圓規颱風,未來猶是會持續增強,而且結構猶咧重整當中,未來持續向西北的方向,轉西的方向漸漸通過巴士海峽,路線若維持不改變,預估上快10/10暗時就會針對巴士海峽發佈海上颱風警報。」

氣象專家指出,雖然暴風圈無接觸著陸地,毋過外圍環流的影響猶是愛要意,尤其是東半部,著愛注意有大水雨。

台灣永續環境工程顧問公司總監賈新興表示:「圓規風颱規个外圍環流的結構,相對比較較大,風颱的偏東風拄著中央山脈,就會佇食風爿的東半部,
帶來較明顯的雨勢。」

圓規風颱愈來愈倚,氣象局11號發佈陸上強風特報,台南以北、東半部、恆春半島、金門、馬祖會有9到12級強陣風,台灣附近沿海的湧,差不多有3米至5米,抑若西太平洋猶閣有一个風颱南修,目前對台無直接的影響。

 

全台敬老金大調查

相關新聞