蔡英文視察太空中心 林智堅陪同說縣市合併

總統蔡英文14來到新竹，第一站來到國家太空中心，新竹市長林智堅佮民進黨立院黨團總召柯建銘，嘛做伙陪同。林智堅嘛趁致詞的時陣順紲講著大新竹合併的目的。

新竹市長，林智堅表示：「關鍵的時刻，台灣優先產業優先，咱應該來思考大新竹的合併，予台灣佇咧國際上，閣較有競爭力，閣較有影響力。」

紲落來第二站幼兒園，總統蔡英文除了了解開學前的準備工課，嘛針對新竹縣市合併升格的議題表示，新竹是全台灣產業上重要的所在，新竹縣市合併是關係著國家整體規劃的重大議題。

總統蔡英文表示：「這確實是關係著國家整體規劃的重大議題，咱除了愛考慮民意的反應以外，咱佇法制面的配套措施，閣有其他的因素考量，攏必須有審慎嚴謹的討論。」

大新竹合併升格，市長林智堅主張縣市合併，縣長楊文科欲竹竹苗合併，短時間內各界猶未達成共識，總統的態度動見觀瞻，表達意見嘛閣較謹慎。