新北一聲增加11本土 包含10例是三峽家庭相穢

新北市29增加11个本土病例,是從疫情警戒降做二級以來,頭一改確診超過10人,其中1个人是板橋遠東百貨公司的專櫃小姐,另外10个人是三峽家庭相穢的群聚案。另外,台北市29增加的2个本土病例內底,1个是進前就對美國來臺灣,而且已注過2筒BNT的民眾,這馬欲閣轉去美國,所以自費做採檢確診,抑若伊佇臺灣的期間,捌去過基隆、新北、桃園、宜蘭和花蓮等縣市。

新北市29新增加本土個案11例,是全臺灣疫情警戒降做二級以來,頭一改確診超過10个人,2个是新增的、9个是居家隔離陰性轉陽性,其中三峽有10个、板橋有1个。三峽群聚案是屬於家庭相穢,12个人蹛做伙,10个人確診,案號16072因為欲去病院做胃鏡,結果採檢是陽性,CT值31,𪜶牽手、2个後生佮2个查某囝、猶閣有𪜶牽手的小妹、妹婿佮𪜶2个囡仔齊確診,干焦一个外甥仔和太太小妹的朋友,攏總2个人採檢陰性,這件家庭互相相穢的群聚案,CT值攏30以上,除了擴大匡列採檢以外,新北市長侯友宜嘛共中央喊聲,針對CT值30以上、無傳染力的確診者,著愛趕緊制定出一套機制。

新北市長侯友宜表示:「CT值30以上的,大部份攏已經是舊的個案,袂穢人。遮的狀況,一定愛建立另外一套新的機制,若無,萬不二遮的無傳染力,或者是舊的個案,
百面會對經濟生活教育造成影響。」

新北市新增加2个本土個案,除了三峽家庭相穢的群聚案以外,另外一个是枋橋遠東百貨公司的專櫃小姐,百貨公司28歇睏做消毒,目前1千3百23人篩檢是陰性,因為相關人數猶例確認當中,29閣暫停營業一工。抑若臺北市29新增加2例本土個案,其中1例,是7月23對美國來臺灣,已經注過2筒BNT疫苗,8月初5採檢攏是陰性,28欲斷去美國進前,採檢驗出陽性,CT值36,行蹤捌去過基隆、新北、桃園、宜蘭佮花蓮五个縣市,佮另外一个新增加的個案仝款,感染源不明,猶愛調查。

臺北市衛生局疾管科長張惠美表示:「CT值36,所以可見伊的風險是比較較低的。」

針對伊的行蹤,臺北市衛生局猶咧做疫調,毋過有店頭已經公告接著確診者有去行踏過的通知,中山區的甜路店佮賣拉麵的店頭嘛攏已經暫停營業做消毒,新北市嘛公佈確診者的行蹤,伊捌去過白沙灣海水浴場、枋橋遠東百貨公司、居酒屋和土城的壽司店,另外,嘛提醒有去過遮的所在的民眾,愛注意家己健康的狀況。
 

相關新聞

專題|全台敬老金大調查