文史團隊改造嘉義市場空間 𤆬高中生認捌在地

1914年正式營運的嘉義市東市場,長期照顧在地人生活的需求,親像是嘉義人生活的歷史仝款,地方文史團隊配合建築、藝術等資源來開課程,邀請高中、高職的學生,做伙來設計,予市場會當有新的面貌,嘛希望予逐家了解傳統市場的文化。

𤆬高中職的學生踅市仔,毋但看傳統的生活,嘛欲看空間的改善。嘉義市在地文史團體,想欲活化市場內無咧使用的空間,邀請高中職學生做伙來參與。

計畫執行人呂武隆表示:「東市場的現況,有一寡無咧用的擔仔位,無好好仔來使用,團隊是感覺講,會當予青少年這个機會,提出一寡想像。」

佇課程安排當中,主辦單位除了予學生認捌市場,嘛請販仔來講東市場的問題佮故事,希望強化在地囡仔對這个傳統市場的感情。

上課學生劉同學表示:「其實我一開始攏毋知影遮的歷史,或者是進前遮捌發生啥物代誌,親像𪜶做的規劃,我以前攏無發現,是參加這改的活動才知影,原來有一陣人,欲好好仔拍拚來經營這个市場。」

東市場販仔吳先生表示:「逐家的想法當然是感覺袂䆀,看敢會當有新的無仝款的感覺,閣加上傳統的元素。」

主辦單位表示,這个課程的成果,是東市場的販仔佮在地囡仔做伙完成的,紲落來嘛會去揣主管單位提供作品,希望會當替這个市場的空間,帶來改變的頭一步。
 

九合一選舉指南

相關新聞