文化部閣推藝文紓困 積極展演上濟補助250萬

圖 文化部
文化部今仔日閣再推出「積極性藝文紓困補助方案」,希望會當維持藝文創作,嘛欲推廣現場佮線頂的仝時演出。

藝文紓困4.0申請已經結束,文化部表示藝文紓困較屬於急難救助金,只是予藝文團隊勉強度生活,但是藝文環境估計,一年後猶真歹恢復正常,所致文化部閣再捒出「積極性藝文紓困補助方案」。

文化部長李永得表示:「阮訂出三个目標,創作能量不中斷、第二人才無流失、第三數位再進化。毋但藝文表演團體,包括視覺藝術、工藝、出版、文創設計等等,甚至博物館、美術館攏會當申請」。

面對疫情的不確定性,藝文產業必須提早準備飽足的能量,新的創作排練、實驗計畫,以及人才培育攏會使提出申請,尤其是線頂佮實體的同步演出,更加是目前重要的發展趨勢

李永得講:「阮嘛用真大的力量,鼓勵所有的表演團體,用虛實整合方式來做表演。現場票可能賣五成到六成,另外佇線頂嘛會使賣票演出」。

嚎哮排演團長黃建豪指出:「線頂劇場這件代誌,上重要就是愛有人開發出予阮進行線頂演出,猶會當賣票的機制。無若一个人買票,逐家圍咧做伙看,我等於損失十張票」。

相關的補助對8月16到9月22截止,政府部門提經費,幫助藝文產業佇疫情中行出活路,毋過新的表演模式觀眾的接受度如何,以及相關的配套措施如何因應,嘛是大考驗。

全台敬老金大調查

相關新聞