臺北補習班對萬華開始注射 其他毋知排當時
郭柏均 莊沛文 / 台北報導
發布時間：
更新時間：
臺北市前幾工替高中以下的教職人員注疫苗，今仔日輪著萬華地區的補習班業者來注。市長柯文哲嘛宣佈，國小歇熱期間的活動，對8/9開始會使帶條件開放。
撆手䘼，護理師消毒、注疫苗。台北市前幾工，替高中以下的教職人員注疫苗，30這工輪著補教業者，毋過是先對艋舺地區開始注，總共226人，別位的補習班閣愛聽候安排。
補教業者講，「對囡仔，阮嘛較安心，對家長來講，家長嘛會較放心共囡仔交予阮。」也有補教業者表示，「阮規間公司，我佮主任是頭兩个來注疫苗的，其他攏注無著，攏猶閣咧排、咧等，攏猶未輪著in。」
教育局表示，補習班注疫苗的名單，攏是按照補習班予教育局的名冊落去排的，30這工就會全數注了，無注著的業者，著愛看紲落來的安排、抑是家己上疫苗登記平台登記。另外台北市長柯文哲表示，國小歇熱期間若欲辦社團活動等等，8月初9開始、會使有條件開放。
台北市長柯文哲表示，「課後照顧服務班、學藝班，學習扶助佮課後社團，但是主要愛以靜態的為主，校內學生為限，每班限制20人。」
柯文哲表示，老師以注疫苗了後，滿14工的優先，若是猶未注疫苗，著愛有7工以內的篩檢陰性證明。為著避免食飯會有傳染風險，遮的活動以半工為原則；若猶是有食飯的需求，著採用分開貯的餐盒仔，而且座位愛用隔枋分開。
2022杭州亞運 台灣百金之路
