李登輝過身欲1冬 李安妮促設立紀念圖書館
鄭雅文 張育睿 / 臺北報導
發布時間：
更新時間：
目次
前總統李登輝過身了後，咧欲對年，李登輝基金會參幾若个民間團體、今仔日做伙出面，呼籲政府，愛設立國家級的李登輝紀念圖書館。另外前日本首相-安倍晉三，有想欲來臺灣，共李登輝祭拜，李登輝的查某囡李安妮，也講這是一層好代誌，毋過疫情的關係，無一定愛佇7/30這工來。
講著老爸不時喉滇，前總統李登輝過身就欲對年，伊的查某囡也是李登輝基金會董事長李安妮，這改特別出面呼籲政府，應該共同推動國家級的李登輝圖書館，希望地點佇徐州路台大舊法學院。
李登輝基金會董事長 李安妮講，「阮也了解政府對這件代誌是正面的，只是希望加聽家屬的意見，也加聽各方的意見，我想今仔日大概有迒出小小一步，明仔載我會上山，就參老爸做一个報告。」
與會的台大總務長也表示，校方持正面態度，毋過因為牽涉古蹟等等問題，愛佮政府相關單位討論，仝場的立委也指出已經有人提案修法，會盡力協助，另外參李登輝有深交的日本前首相安倍晉三，也佇日本產經新聞訪問時表示，只要情勢允准，想欲來台灣掃墓。
李登輝基金會董事長 李安妮講，「我相信這是一件好事，阮閣佇努力當中，我想就是欲去五指山，也無一定愛佇7月30這工，任何的時間事實上攏是會使的。」
李安妮表示，家己的老爸參安倍的感情就親像爸仔囡，所以也幽默表示IN可能會佇夢中來溝通喬時間。針對安倍的表達，外交部也強調，台灣佮日本互相是珍貴的朋友，若來訪問，會全力提供協助。
專題｜改造地獄路 台灣行人路為何難行？
