降二級准鋏尪仔機營業 業者:防疫顧規工成本重

指揮中心宣布警戒降級了後,鋏尪仔機的店只要有人顧店,控制出入的人數、加強消毒就會當營業,不過濟濟業者來講成本傷懸,而且嘛質疑講無人顧的店頭滿四界,為怎樣干焦對鋏尪仔機的店做管制。

一台一台的鋏尪仔機,電火攏無著,內底空空空,因為疫情,尪仔機店已經停睏兩個外月,中央宣布二級警戒7月27開始,業者只要佇營業時間派專人佇現場加強人流管制和環境消毒就會當重新開店,不過對24小時營業的業者來講,開銷傷大、根本做袂到。

娃娃機業者:「若是倩人三个人來講,一個月就愛七八萬,開銷一定比收入加足濟。」 

業者表示雖罔這兩個月中央停收娛樂稅和營業稅,不過猶是有袂少人因為店租和機台租金納袂出來,攏已經退場。也有業者質疑,鋏尪仔機店一點鐘有三四个人客就愛偷笑,群聚機會根本無大。

尪仔機業者講,「逐家鋏了就出來矣,可能短短一兩分鐘,像一般自助洗衫店或者是洗車場,in本身嘛是屬於自助式無人商店,像in嘛無所謂專人咧控管。」

原本掠準降級就會當轉來做生理,業者猶是希望中央會當重新思考,予in較好過日。 

相關新聞

專題|全台敬老金大調查