政治犯受非法管訓猶無通平反 人權會促修法

舊年八月成立的監察院-國家人權委員會,今仔日公佈頭一份人權調查報告,是60年前臺北市議員-林水泉批評政府,煞予人講是鱸鰻、掠去管訓。親像這款國家用行政手段,來侵害人權的事件,目前猶有25案。國家人權委員會強調講:會請行政院定出相關法規,還予政治受難者一个清白。

政治受難者林水泉:「伊講我鱸鰻矣,法院就無效矣,法院,我毋捌去刣人,也毋捌去相拍抑是啥物,就予人掠去關矣。」

今年85歲的林水泉佇美國,透過影片,講出這一、二十年,欲替家己洗清罪名的心聲。1961年伊選臺北市第五屆議員期間,因為發表政治性意見,予政府以鱸鰻名義,送小琉球管訓1年8個月。因為判決並毋是刑事有罪判決,司法程序無法度聲請平復,也因為相關資料拍無去、僫調查,落尾敗訴。國家人權委員會14公布頭一份人權調查報告,認定這案就是國家不法侵害人權的標準案件。

國家人權委員會副主委高涌誠說明,「司法部份確實駁回伊冤獄賠償的聲請,理由就是講雖罔477號釋憲放寬,戒嚴時期人民受損權利恢復條例的範圍,毋過伊猶是愛以刑事判決為主。」

國家人權委員會委員張菊芳表示,「針對這个部份促轉會佇今年初,伊已經公告修正草案,也就是講伊有做部份的修正,伊共平復行政不法,伊已經列做增訂確認,平復行政不法的要件佮事項。」

促轉會表示,若是威權統治時期國家不法行為被害者權利回復條例會當立法通過,被害者和in的家屬就通向國家請賠償。針對林水泉管訓所在小琉球職三總隊,敢會列做不義遺址,促轉會表示因為主建物已經拆除,這陣算潛在的不義遺址,已經請相關機關提供建物史料,進一步確認。

相關新聞

專題|全台敬老金大調查